सिडनी, अष्ट्रेलिया ।

~छोरी मान्छे
ऊ आमाको कोखबाट जन्मियो
छोरो भएर
उनी त्यही कोखबाटै जन्मिइन
छोरी भएर

दुई सन्तान ईश्वरको वरदान
तर…
समाजले एउटालाई भगवान बनायो
अर्कोलाई परिचय खोज्न सिकायो

“छोरी मान्छे” को परिचय
छोरी मान्छे भएर यो गर्नु पर्छ
छोरी मान्छे भएर यो गर्नु हुँदैन

भन्छन,
समाज फेरियो
सोच फरियो
नारीप्रतिको सम्मान फेरियो
अफसोच
फेरिएको त सताब्दी मात्र थियो
न सोच फेरियो न समाज फेरियो

जमघटमा बा-आमा
छाती फुलाउँदै भन्छन
-छोराछोरी बराबरी
भिडमा नारीवाद गर्जन्छ
-नारीपुरुष बराबरी

तर घरभित्र अनि समाजभित्र

दाजुभाईसँगको झगडामा होस
लोग्नेसँगको कलहमा होस
या समाजसँगको लडाईँमा होस

बा-आमाको अर्को स्वर हुन्छ
समाजको चर्को स्वर हुन्छ

~छोरी मान्छे हो सहनु पर्छ
छोरी मान्छे हो बेहोर्नु पर्छ
छोरी मान्छे हो मौन बस्नु पर्छ
छोरी मान्छे हो शिर झुकाउनु पर्छ

सँगै खेल्दाको झगडामा
दाजुसँग झुक्न
सिकाउने बाआमाले
मर्दको नाममा हुने
अन्याय अत्याचारदेखि
बिबाहको मन्डवसम्म झुक्न
सिकाउने समाजले
छोरी मान्छेलाई
शीर उचो बनाएर बाँच्न कहिले दिने?
स्वतन्त्रतामा हाँस्न कहिले दिने?

आफूले भोगेको दुख
बिभेदको संस्कार
आमाहरु बिन्ती
आफ्नो छोरीहरुमा नदिनुस
छोराले बोल्दा
छोरीको असहमतिहरु
पनि सुनिदिनुस
छोरी मान्छे भएर
गर्नुहुने र नहुने
सिमाना नकोर्नुस
एउटा मानव भएर
के सहि के गलत
छु्टयाउने हैसियतको बनाउनुस
आत्मनिर्भर बन्न सिकाउनुस
अन्याय बिरुद्द
आवाज बुलन्द बनाउन सिकाउनुस
दुखमा नआत्तिन र सुखमा
नमात्तिन सिकाउनुस
अनि फेरि यो समाजले दायरा नकोरोस
छोरी मान्छे भएर…………

✍️ श्वेता मैनाली
सिड्नी, अष्ट्रेलिया ॥