
काठमाडौं । कोभिड संक्रमण फैलिने क्रम पुनः तीव्र बनेसँगै विद्यालयहरू बन्द भएका छन् । यस्तोमा बालबालिकाको पठनपाठन प्रभावित हुन नदिन सरकारले वैकल्पिक माध्यमबाट सिकाइलाई निरन्तरता दिने भएको छ ।
यसका लागि शिक्षा तथा मानव स्रोत विकास केन्द्रले पाठ्यक्रम र पाठ्यपुस्तकमा आधारित श्रव्य दृश्य सामग्री तयार पारेको छ । ती श्रव्यदृश्य पाठहरू प्रसारण हुने समय तय गरिएको छ ।
जसअनुरूप कक्षा ७ र ८ का विषयगत पाठहरू बिहान ५ः४५ बजेदेखि ७ बजेसम्म र कक्षा ६ र ५ का श्रव्यदृश्य पाठहरू बिहान ७ः४५ बजेदेखि ९ बजेसम्म तथा कक्षा १ देखि ४ सम्मका पाठहरू अपरान्ह ४ः३० बजेदेखि साँझ ७ बजेसम्म शनिबार बाहेकका दिन प्रसारण हुनेछन् । जुन नेपाल टेलिभिजनको एनटिभी प्लस च्यानलबाट प्रसारण भइरहेका छन् ।
त्यस्तै कक्षा १ देखि १० सम्मका विषयगत श्रव्यदृश्य सामग्रीहरू डिशमिडिया नेटवर्कको डिशहोम, नेट टिभी, म्याक्स टिभी, मेरो टिभी र क्लियर टिभीको स्कुल एजुकेसन अर्थात विद्यालय शिक्षा च्यानलबाट समेत शनिबार बाहेकका दिनमा बिहान ७ बजेदेखि बेलुकी ९ बजेसम्म प्रसारण भइरहेका छन् ।
जसअनुरूप कक्षा ९ र १० का अनिवार्य विषयका श्रव्य पाठहरू रेडियो नेपालबाट शनिबार बाहेक प्रत्येक दिन साँझ ५ः१५ बजेदेखि ५ः४५ बजेसम्म र बेलुकी ७ः२५ बजेदेखि ७ः५५ बजेसम्म नियमित प्रसारण भइरहेको छ ।