चितवन । चितवनमा माओवादी केन्द्र छाड्ने क्रम बढ्दै गएको छ । माओवादीका जिल्ला सहइन्चार्ज यमबहादुर परियारले माओवादी केन्द्र छाडेसँगै माओवादी छाड्ने क्रम बढेको हो ।
चितवनका विभिन्न पालिकाबाट माओवादीका नेता तथा कार्यकर्ताहरु गरी १५० जना नेता कार्यकर्ता आज एकैदिन एमाले प्रवेश गरेका छन् । पार्टी प्रवेश गरेकाहरुलाई एमाले पोलिटव्युरो सदस्य तथा चितवन जिल्ला इन्चार्ज देवी ज्ञवालीलगायतले स्वागत गरेका थिए ।
यसअघि केन्द्रीय अध्यक्ष केपी शर्मा ओलीले परियारसँगै माओवादी नेता अन्जन तिमिल्सिना र अन्य नेताहरुलाई एमाले प्रवेश गराएका थिए । त्यसपछि चितवनमा माओवादी छाडेर एमाले प्रवेश गर्नेहरु बढेका छन् । यो क्रम निरन्तर जारी रहने एमाले चितवनका अध्यक्ष रामप्रसाद न्यौपानेले जानकारी दिए ।