काठमाडौँ । नेपाली क्रिकेटका लागि आज महत्त्वपूर्ण दिन रहनेछ । नेपालको सिनियर र उमेर समूहको दुवै राष्ट्रिय टोलीले आज युएईसँग खेल्दै छन् । दुवै खेल युएईमै हुँदैछ । र, दुवै टोलीको अन्तिम लक्ष्य विश्वकप नै छ ।
सिनियर टोलीको तुलनामा जुनियर टोली विश्वकपको निकै नजिक छ । त्यसैले यु-१९ टोलीको खेल निकै महत्त्वपूर्ण हुनेछ ।
अर्को वर्ष श्रीलङ्कामा हुने यु-१९ विश्वकपका लागि भइरहेको एसिया क्षेत्रको छनोटको अन्तिम खेलमा आज नेपाल र युएई खेल्दै छन् । राउण्ड रोविन लिगको अन्तिम खेल भए पनि यो खेल फाइनल जस्तै हुनेछ ।
६ राष्ट्र सहभागी छनोटबाट शीर्ष स्थानमा रहने एक टिम मात्र विश्वकपमा पुग्नेछन् । त्यसैले नेपालका लागि यो खेल जित्नैपर्ने अवस्था छ । उता नेपालको सिनियर टोली अहिले लिग टु अन्तर्गत शृङ्खला खेल्न युएईमा छ । नेपालले पहिलो खेलमा पपुवा न्यु गिनीलाई पराजित गरिसकेको छ । लिग टु को शीर्ष तीनमा रहँदै आगामी जुन-जुलाईमा जिम्बावेमा हुने विश्वकप छनोटमा स्थान बनाउने लक्ष्यमा रहेको नेपाललाई युएईविरुद्धको खेल पनि जित्नैपर्ने छ ।
यस खेल जितेमा नेपालको ३० खेलबाट (घ) अङ्क हुनेछ र नेपाल युएईलाई पछि पार्दै ७ राष्ट्र सहभागी लिग टु मा पाँचौँ स्थानमा समेत उक्लनेछ । नेपालले अब ७ खेल खेल्न बाँकी छ । जसमध्ये ६ खेल जितेमा नेपाल शीर्ष तीनमा पुग्नेछ । युएईका लागि पनि शीर्ष ३ मा स्थान बनाउन बाँकी ७ मध्ये ६ खेल जित्नैपर्ने अवस्था छ । युएई शृङ्खलाको पहिलो खेलमा पपुवा न्यु गिनीसँग पराजित भएको थियो ।
युएई २९ खेलबाट २९ अङ्कसहित पाँचौँ स्थानमा छ । ३० खेलबाट ७ अङ्क रहेको पपुवा न्यु गिनी अङ्कतालिकामा पुछारमा रहने पक्का भइरहेको छ।