मेलबर्न – एनआरएनए चुनाव २०२५ : टिम एकता जितको प्रतीक्षामा, चुनावी माहोल तताएको छ
मेलबर्न, जुलाई ११ – गैर आवासीय नेपाली संघ (एनआरएनए) अष्ट्रेलियाको आगामी कार्यकाल (२०२५–२०२७) का लागि भिक्टोरिया राज्यमा ‘टिम एकता’ चुनावी मैदानमा सशक्त रूपमा उत्रिएको छ। “संस्थागत रूपान्तरण, सामाजिक एकता र एनआरएनप्रतिको प्रतिबद्धता” भन्ने मूल नारासहित प्रस्तुत भएको टिम एकताले उम्मेदवारहरूको पूर्ण र अनुभवी सूची सार्वजनिक गर्दै चुनावी माहोललाई पूर्णरूपमा तताएको छ।
अनुभवी नेतृत्व, स्पष्ट दृष्टिकोण र समावेशी संरचनाले टिम एकतालाई अबको नेतृत्वका लागि सर्वश्रेष्ठ विकल्पका रूपमा उभ्याएको छ। राज्य संयोजक पदमा दोर्ण पन्त समिरको उम्मेदवारीले स्थायित्व र दिगो नेतृत्वको संकेत गरेको छ भने, उप–संयोजक बिकास सिलवाल, सचिव देवेन्द्र बजगाईं, कोषाध्यक्ष खिम गौतम र सह–सचिव पुष्कर भट्टराई, सदस्य पदका लागि के. राज खनाल, रविन फुँयाल, रविन उप्रेती, पुष्पराज पाण्डे, मनिष काफ्ले, पवन खतिवडा, विवेक लुइँटेल र विपुल ज्ञवाली जस्ता परिचित र परिणाममुखी अनुहारहरूलाई अघि सार्दै टिमले मजबुत सन्देश दिएको छ।
टिम एकताले युवाहरूदेखि महिलासम्मलाई नेतृत्वमा अघि ल्याउँदै समावेशीता र प्रतिनिधित्वमा नयाँ मापदण्ड स्थापना गरेको छ। युवा संयोजक सनराइज ज्ञवालीको नेतृत्वमा शंकर श्रेष्ठ, सरोज सापकोटा, भूपाल रेग्मी, सुदीप शाही, असीष खनाल र सञ्जय बनियाँ जस्ता युवाहरूको टोलीले एनआरएनएमा नयाँ ऊर्जा भर्ने दाबी गरिएको छ।
त्यस्तै, नारी संयोजनमा सिर्जना रायमाझीको संयोजकत्वमा पुष्पकला खड्का, अन्जुमा श्रेष्ठ, प्रीति श्रेष्ठ, राधिका गौतम, सुजता राई र सुजता चौलागाईं जस्ता महिलाहरूको सहभागिताले टिमको समावेशी सोच र नारी सहभागिता प्रतिको प्रतिबद्धता देखिएको छ।
चुनाव मिति (२६ जुलाई) नजिकिँदै जाँदा पनि अन्य प्रतिस्पर्धी प्यानलहरूले औपचारिक घोषणा नगरेको अवस्थामा टिम एकताको रणनीति, संरचना र समयमै गरिएको तयारीले स्पष्ट अग्रता लिएको देखिन्छ। टिम एकताको अभियानले जति नै चर्चा र जनसमर्थन बटुलिरहेको छ, त्यसले यसपटकको निर्वाचनमा “जित पक्का” भन्दै समर्थकहरूबीच उत्साह थपेको छ।
टिम एकताको अभियान अब सधैंको नेतृत्वको शैली परिवर्तन गर्दै नयाँ पुस्ता, नयाँ सोच र पारदर्शी कार्यशैलीको संकेत बनिरहेको छ। “हामी जित्ने होइन, परिवर्तन ल्याउने हो,” भन्ने नारासहित अघि बढेको टिम एकता अहिले भिक्टोरियामा सबैभन्दा मजबुत र उत्साहित समूहको रूपमा उभिएको छ।
नाम नखुलाऊने सर्तमा टिम एकताका सक्रिय टिम मेकरका अनुसार घोषणा संगै अन्य टिमका साथिहरूले मिलेर अगाड़ी बढ़न प्रस्ताव समेत राखेको बताएका छन त्यो निर्णय गर्न स्टेट कमिटिलाई अधिकार रहको समेत बताए ।
एनआरएनए अष्ट्रेलियाको यो कार्यकालको चुनावमा टिम एकता न केवल प्रतिस्पर्धामा छ, बरु जीतको प्रमुख दाबेदारको रूपमा उभिएको छ। अब चुनावी निर्णय भोटमा हुने भए पनि, भिक्टोरियामा चुनावी लहर टिम एकताको पक्षमा स्पष्ट देखिन थालेको छ।
