एनआरएनए एनएसडब्लु निर्वाचनमा ‘टिम एकता’को उम्मेदवारी घोषणा, उषा किरण पोखरेलको नेतृत्वमा समावेशी परिवर्तनको अभियान
सिड्नी, जुन २६ — गैरआवासीय नेपाली संघ (एनआरएनए) न्यू साउथ वेल्स (एनएसडब्लु) को आगामी कार्यकाल (२०२५–२७) का लागि ‘Team Ekata NSW: For Change’ ले औपचारिक रूपमा उम्मेदवारी घोषणा गरेको छ। सामाजिक समावेशिता, पारदर्शिता र उत्तरदायित्वयुक्त संस्थागत संरचनाका साथ परिवर्तनकारी नेतृत्वको अभियानका रूपमा यो समूह अघि बढेको छ।
यस अभियानको नेतृत्व चर्चित सामाजिक अभियन्ता उषा किरण बारिया पोखरेल ले गरिरहेकी छन्, जसले राज्य संयोजक पदका लागि उम्मेदवारी दिएकी छन्। नेपाली समुदायभित्र लामो समयदेखि सामाजिक उत्तरदायित्वमा सक्रिय पोखरेल एक निडर, सत्यनिष्ठ र स्पष्ट दृष्टिकोण भएकी नेतृत्वकर्ताका रूपमा चिनिन्छिन्।
दूरदृष्टियुक्त नेतृत्वमा पोखरेलको सक्रियता
विद्यालय कालदेखि नै नेतृत्व क्षमताको अभ्यास गर्दै आएकी पोखरेल आप्रवासी जीवनमा पनि नेपाली समुदायलाई एकताबद्ध गर्ने, सामाजिक सरोकारमा साथ दिने र समस्या समाधानमा योगदान पुर्याउने भूमिकामा सक्रिय रहिएकी छन्। विशेषतः महिला सहभागिता, युवाहरूको सशक्तीकरण र परिवार–केन्द्रित सामाजिक पहलमा उनको भूमिका उल्लेखनीय छ।
उम्मेदवारी घोषणासभामा बोल्दै उनले भनिन्, “सार्थक परिवर्तन तब मात्र सम्भव हुन्छ जब हामी एउटै लक्ष्यका लागि सहकार्य गर्छौं। नेतृत्व पदको लागि होइन, सेवा गर्नका लागि हो।”
समूहका उम्मेदवारहरू र विविध प्रतिनिधित्व
‘टिम एकता एनएसडब्लु’ ले विभिन्न क्षेत्र, पृष्ठभूमि र अनुभव भएका उम्मेदवारहरूको नाम सार्वजनिक गरेको छ, जसले एनएसडब्लु राज्यको विविधता झल्काउँछ:
उषा किरण बारिया पोखरेल – राज्य संयोजक
चण्डिका ओली ओदारी – उप–संयोजक
प्रताप पन्थी – सचिव
बिजय घिमिरे – सह–सचिव
अनिल त्वनाबासु – कोषाध्यक्ष
रमेश सिंह – युवा संयोजक
सनीता लामा – महिला संयोजक
‘नयाँ सोच, नयाँ दिशा’: टिम एकताको दृष्टिकोण
‘परिवर्तनका लागि एकता’ भन्ने मूल नारालाई आत्मसात गर्दै समूहले समावेशी नेतृत्व, नीतिगत पारदर्शिता र संस्थागत सुधारलाई प्राथमिकतामा राख्ने स्पष्ट गरेको छ। उम्मेदवारी घोषणासँगै समुदायभित्र आशावादी वातावरण, सकारात्मक संवाद र स्वस्थ प्रतिस्पर्धाको लहर देखिएको छ।
समूहले एनआरएनए एनएसडब्लुलाई सबै नेपालीको पहुँचमा हुने, प्रभावकारी रूपमा सञ्चालन हुने र उत्तरदायी संस्था बनाउने संकल्प लिएको छ।
