सन्दिप अधिकारीद्वारा एनआरएनए अष्ट्रेलिया – एनएसडब्ल्यु सचिव पदका लागि उम्मेदवारी घोषणा
सिड्नी, अष्ट्रेलिया | ५ जुलाई २०२५
गैर–आवासीय नेपाली संघ (NRNA) अष्ट्रेलिया अन्तर्गत न्यू साउथ वेल्स (NSW) राज्य समन्वय परिषद् (SCC) को २०२५–२०२७ कार्यकालका लागि नेपाली समुदायमा सक्रिय युवा नेतृत्वकर्ता सन्दिप अधिकारीले एनएसडब्ल्यु सचिव (NSW Secretary) पदमा आफ्नो उम्मेदवारी औपचारिक रूपमा घोषणा गरेका छन्।
यसअघि उनले सामाजिक सञ्जालमार्फत उम्मेदवारीको जानकारी गराइसकेका थिए भने, अब एक औपचारिक सन्देश मार्फत आफ्नो प्रतिबद्धता, दृष्टिकोण र टिमको भावी योजना सार्वजनिक रूपमा प्रस्तुत गरेका छन्।
उम्मेदवारी घोषणासँग अधिकारीको सन्देश:
“समुदायका अग्रजहरूप्रति सम्मान प्रकट गर्दै, अनुभव, युवाको जोश र काम गर्ने सक्षम टोली लिएर हामी अगाडि बढेका छौं। हाम्रो टिम सच्चा, समर्पित र पारदर्शी समाज–सेवामा दृढ छ। हिजोका अनुभव र आजका सक्रियतासँगै हामी सबैको सहभागितामा एक मजबुत डायस्पोरा निर्माण गर्न चाहन्छौं।”
उनले समावेशी नेतृत्व, पारदर्शी कार्यशैली, र जिम्मेवार संस्था निर्माण गर्ने अठोट व्यक्त गर्दै “सक्रिय सहभागिता र सामूहिक नेतृत्व” मा आधारित अभियान अघि बढाउने बताए।
निर्वाचन जानकारी:
निर्वाचन मिति: २६ जुलाई २०२५ (शनिबार)
पद: सचिव – NRNA NSW राज्य समन्वय परिषद्
सन्दिप अधिकारीका प्राथमिकताहरू:
संगठनको कार्यशैलीमा पारदर्शिता र जवाफदेहिता सुनिश्चित गर्नु
युवा सहभागिता र नेतृत्व विकासमा विशेष जोड
समाजसेवामूलक कार्यक्रमहरूलाई थप प्रभावकारी बनाउने
आपतकालीन अवस्थाहरूमा सक्रिय सहायताको संयन्त्र निर्माण गर्नु
नेपाली समुदायबीच सांस्कृतिक, सामाजिक र भावनात्मक एकता मजबुत बनाउनु
समुदायमा सकारात्मक प्रतिक्रिया
सन्दिप अधिकारी लामो समयदेखि अष्ट्रेलियाको नेपाली समुदायमा युवा नेतृत्वकर्ता, समन्वयक र क्रियाशील कार्यकर्ताको रूपमा परिचित छन्। विगतमा उनले विभिन्न सामाजिक तथा संस्थागत अभियानहरूमा देखाएको सक्रियता र इमानदार छविले उनलाई सचिव पदका लागि एक योग्य र आशालाग्दो उम्मेदवारको रूपमा स्थापित गराएको छ।
उम्मेदवारद्वारा समर्थनका लागि अपिल:
“म सम्पूर्ण एनएसडब्ल्यु निवासी नेपाली समुदायसँग हार्दिक अनुरोध गर्दछु— आउनुहोस्, हाम्रो सामूहिक भविष्यको निर्माणमा तपाईंको सुझाव, समर्थन र सहभागिता प्रदान गर्नुहोस्। हामी सँगसँगै एक बलियो, सशक्त र एकीकृत डायस्पोरा बनाउनेतर्फ अघि बढ्न सक्छौं।”
