एनआरएनए अष्ट्रेलियाको उपाध्यक्ष पदमा रमेश पौडेलको उम्मेदवारी घोषणा, पारदर्शिता र जवाफदेहिताको प्रतिबद्धता
ब्रिजबेन, अष्ट्रेलिया – असार ३२, २०८२ — अर्घाखाँची जिल्लाको भूमिकास्थान नगरपालिका–६, खिल्जी रामकोटका स्थायी निवासी रमेश पौडेलले गैरआवासीय नेपाली संघ (एनआरएनए) अष्ट्रेलियाको आगामी कार्यकाल (२०२५–२०२७) का लागि उपाध्यक्ष पदमा उम्मेदवारी दिने औपचारिक घोषणा गर्नुभएको छ। हाल ब्रिजबेनमा स्थायी रूपमा बसोबास गर्दै आउनुभएका पौडेल अष्ट्रेलियामा रहेका नेपाली समुदायको हितका लागि लामो समयदेखि सामाजिक नेतृत्वदायी भूमिकामा सक्रिय रहँदै आउनुभएको छ।
पौडेलले उम्मेदवारी घोषणा गर्दै संस्थाभित्र देखिएको अपारदर्शिता, गुटबन्दी र जवाफदेहीताको अभावलाई अन्त्य गर्दै एनआरएनएमा पारदर्शी, समावेशी र उत्तरदायी नेतृत्व स्थापित गर्ने आफ्नो लक्ष्य रहेको बताउनुभयो।
एनआरएनएको रूपान्तरणका लागि स्पष्ट दृष्टिकोण
उहाँले एनआरएनए अष्ट्रेलियाको वर्तमान अवस्था र भविष्यको दिशा सम्हाल्न दृढ निष्ठाका साथ प्रस्तुत गरेका दृष्टिकोणहरू यस्ता छन्:
विश्वास र एकता पुनःस्थापना: अपारदर्शी निर्णय प्रक्रियाको अन्त्य गर्दै जवाफदेहितालाई सुदृढ बनाउने।
समुदायमा सहभागिता र समावेशिता: महिला, युवा तथा कम प्रतिनिधित्व भएका समुदायहरूको सक्रिय सहभागितालाई प्रोत्साहित गर्ने।
वैश्विक सहकार्य र प्रभाव: एनआरएनए अष्ट्रेलियालाई अन्तर्राष्ट्रिय तहमा प्रभावशाली बनाउँदै नेपाल सरकारसँग व्यावहारिक प्रवासीमैत्री नीतिको वकालत गर्ने।
ठोस नतिजामुखी पहलहरू: शिक्षा, सीप, रोजगारी, आप्रवासन सहायता तथा नेपालस्थित सम्पत्ति सुरक्षा र एनआरएन नागरिकताको सवालमा कार्ययोजना अघि बढाउने।
अनुभव, निष्कलंक इतिहास र नेतृत्वको प्रतिबद्धता
सन् २०११ देखि एनआरएन अभियानमा निरन्तर सक्रिय रहँदै आउनुभएका पौडेलले संगठनका विविध तहमा नेतृत्वदायी भूमिका सम्हाल्दै आउनुभएको छ। उहाँका प्रमुख जिम्मेवारीहरू यसप्रकार रहेका छन्:
सदस्य, मानार्थ परिषद् – NRNA ICC (२०२१–२०२३)
उम्मेदवार सदस्य, ICC – NRNA Global (२०१७–२०१९)
सह–संयोजक, NRNA क्विन्सल्यान्ड (२०११–२०१३)
NCC सदस्य, NRNA अष्ट्रेलिया (२०११–२०१५)
उहाँको यो अनुभवले उहाँलाई सक्षम, परीक्षण भइसकेको र समुदायमा विश्वास हासिल गरिसकेको उम्मेदवार बनाएको छ।
रमेश पौडेलद्वारा नेपाली समुदायप्रति खुला सन्देश:
“अष्ट्रेलियावासी सम्पूर्ण नेपाली दिदीबहिनी तथा दाजुभाइहरूमा नमस्कार,
म रमेश पौडेल, यही जुलाई २६ मा हुन गइरहेको एनआरएनए अष्ट्रेलिया (२०२५–२०२७) निर्वाचनमा उपाध्यक्ष पदको उम्मेदवार।
मेरो विचारमा यो केवल यौटा अर्को चुनाव मात्र होइन — यो त खासमा एनआरएनए अष्ट्रेलियाको लागि एक निर्णायक क्षण हो। किनकि हामीले एनआरएनए प्रतिको विश्वास पुनः जागृत गर्नुछ, एकता पुनर्निर्माण गर्नुछ, र हाम्रो मिशनमा पुनः केन्द्रित हुनुछ। त्यसका लागि प्रमाणित ट्र्याक रेकर्डसहितको विश्वसनीय नेतृत्व क्षमता लिएर, स्पष्ट उद्देश्य र इमानदारीका साथ नेतृत्व गर्न म हजुरहरूका माझ आएको छु।
म केवल उम्मेदवार होइन — म समुदायका लागि सकारात्मक कामबाट प्रमाणित एक सामाजिक कार्यकर्ता हुँ। म विगत लामो समयदेखि नेपाली डायस्पोराको आवाज प्रतिनिधित्व गर्न, एकता कायम राख्न र सुधारका लागि क्रियाशील रहँदै आएको छु।
बलियो एनआरएनए अष्ट्रेलियाको लागि हाम्रो दृष्टिकोण:
✊ विश्वास र एकता पुनर्स्थापित गर्ने
✊ समावेशी सहभागिता र सम्मानजनक बहसलाई प्रवर्द्धन गर्ने
✊ विश्वस्तरमा अष्ट्रेलियाको प्रभावशाली उपस्थिति निर्माण गर्ने
✊ शिक्षा, सीप, रोजगारी, सम्पत्ति सुरक्षा र एनआरएन नागरिकताको वकालत गर्ने
मलाई भोट किन?
✔️ विश्वसनीय, जवाफदेही र जनमुखी नेतृत्वको लागि
✔️ विभाजनभन्दा एकता, स्वार्थभन्दा सेवाको लागि
✔️ स्वदेश र विदेश दुवैमा रहेका नेपालीहरूका लागि काम गर्ने एनआरएनएका लागि
अन्तमा, एनआरएनएलाई अझ समावेशी, उत्तरदायी, पारदर्शी र समुदायमुखी बनाउन हजुरहरूको सुझाव, साथ, समर्थन र आशीर्वादको अपेक्षा गर्दछु। हामी सँगै मिलेर उज्यालो, एकताबद्ध र समृद्ध प्रवासी नेपाली समाज निर्माण गर्न सक्नेछौं भन्ने दृढ विश्वास लिएको छु।”
– रमेश पौडेल,
उपाध्यक्ष पदका उम्मेदवार,
एनआरएनए अष्ट्रेलिया (२०२५–२०२७)
